पोखरा ।    खेलकुद तथा सामाजिक क्षेत्रमा त्रियाशिल बुद्धटोल (बिटी) क्लबले एकैसाथ दुई कार्यक्रमको आयोजना गरेको छ ।

युवा दिवसको अवसर पारेर पोखरा १ बगरस्थित पुरानो टुंडिखेलमा अयोजित तेस्रो खुला रक्तदानबाट १ सय ६ युनिट संकलन र ७ मुख्य चोकमा सिसिटिभी जडान गरेको क्लबा अध्यक्ष सन्तोष गुरुङले जानकारी दिए ।

उनका अनुसार नेपाल रेडक्रस सोसाइटी कास्कीको प्राविधिक सहयोग रहेको सो कार्यक्रममा क्लबका सदस्य, स्थानीय, विद्यार्थी लगायतले रक्तदान गरे ।

उनले समाजलाई योगदान दिने उद्देश्यले निरन्तर सामाजिक काममा अग्रसर भएको बताए । ‘हामीले केवल क्लबको गतिविधि बढाउन मात्र होइन, समाजमा प्रत्यक्ष फाइदा पुगोस् भनेर यो कार्यक्रम गरेका हौँ । पोखरा र आसपासका क्षेत्रमा रगतको अभावका कारण कसैले पनि ज्यान गुमाउनु नपरोस् भन्ने हाम्रो मुख्य उद्देश्य हो ।’

उनले युवाहरूलाई सामाजिक उत्तरदायित्वको भावना जगाउन र आकस्मिक बिरामीहरूलाई समयमै रगत उपलब्ध गराउन बिटी क्लबले रक्तदानको आयोजना गरिएको बताए ।

७ मुख्य चोकमा सिसिटिभी जडान

क्लबले सोही सन्दर्भमा बगर क्षेत्रका ७ मुख्य चोकमा सिसिटिभी जडान गरेको छ ।

शान्ति सुरक्षामा टेवा पुर्याउने उद्देश्यले टुँडिखेल चौतारी, मानसडक, बागबजार, हरिचोक, नयाँगल्ली लगायतका चोकमा सिसिटिभी जडान गरिएको निवर्तमान अध्यक्ष अशिम थापाले जानकारी दिए ।

उक्त सिसिटिभीको मनिटरिङ तत्कालका लागि क्लबले गरेपनि प्रक्रिया पुरा गरेपछि वडा प्रहरी कार्यालय बगरलाई जिम्मा दिइने थापाले बताए ।

यसअघि कार्यक्रमको उद्घाटन गर्दै कास्कीका प्रमुख जिल्ला अधिकारी कुमानसिंह गुरुङले सामाजिक कार्यलाई निरन्तरता दिन आग्रह गरे । उनले क्लबको सकारात्मक र रचनात्मक कार्यमा सधैँ साथ दिने प्रतिबद्धता जनाएका थिए ।