राजापुर नगरपालिका र गेरुवा गाउँपालिका करिब ५ हजार किसानहरू गेरुवा गाउँपालिका–१, जनकनगरस्थित कर्णाली नदी थुनेर खेतमा पानी ल्याएका छन् ।

असारको पहिलो सातासम्म पनि पानी नपर्दा रोपाइका लागि स्थानीय स्रोत साधनको प्रयोग गरी श्रमदान गरेर नदी थुनेर पानी ल्याएका हुन् । ओखरिया इन्टेकबाट १० हजार हेक्टर क्षेत्रफलमा सिँचाइ हुने गर्दछ ।

खडेरीले गर्दा खेतमा पानी नपुगेपछि किसानहरू ट्याक्टरमा झाला पाता र काठ दाउरा लिएर नदीमा पुगेका थिए । इन्टेकनजिक रहेको कर्णालीको भङ्गालो स्थानीय स्रोत साधनले थुनेर ओखरिया इन्टेकतर्फ पानी ल्याएका छन् ।

धान रोप्ने सिजनमा हरेक वर्ष किसानले नदीमा अस्थायी बाँध बाँधेर खेतमा पानी पुर्‍याउने गरेका छन् । राजापुर सिँचाइ आयोजनाले निर्माण गरेको राजापुर सिँचाइ प्रणाली अन्तर्गतको संयुक्त बुढीकुलो सिँचाइ प्रणाली अन्तर्गत १२ वटा मौजा रहेका छन् ।

राजापुर सिँचाइ प्रणाली व्यवस्थित रूपमा निर्माण नहुँदा हरेक वर्ष जोखिम मोलेर किसानहरू नदीमा बाँध बाध्न जानुपर्ने बाध्यता रहेको छ । पानीको मुहानदेखि टाढा बुढिकुलाको इन्टेक रहेको हुँदा पानी बुढिकुलासम्म ल्याउन जानुपर्ने बाध्यता रहेको गोला जलउपभोक्ता संस्था अध्यक्ष धनबहादुर शाहीले बताए ।