नुवाकोट। सूचना तथा सञ्चारमन्त्री डा. विक्रम तिमिल्सिनाले बाढी प्रभावित क्षेत्रमा उद्धारसँगै शव सङ्कलन हाल सरकारको प्राथमिकतामा रहेको बताएका छन् ।

भोटेकोशी बाढी प्रभावित क्षेत्रमा भइरहेका उद्धार, राहत सामग्री वितरण तथा शव सङ्कलन लगायतमा सरकारले गरिरहेको कामबारे आज जानकारी गराउँदै मन्त्री डा. तिमिल्सिनाले शव सङ्कलनकै लागि दुई वटा  ‘डेडिकेटेड’ हेलिकप्टर सञ्चालन गरिएको जानकारी दिए ।

मन्त्री डा. तिमिल्सिनाले पूर्ण रुपमा विस्थापितलाई गाँसबास सहितको व्यवस्था गरी  ‘होल्डिङ सेन्टर’ मा राखिएको बतए । अहिले पनि विभिन्न जलविद्युत आयोजनाका सुरुङमार्गमा फसेका भनिएकाको जीवितै उद्धार गर्ने प्रयासमा सरकार अहोरात्र खटिरहेको उनको भनाइ छ।

“बाढीबाट जोगिने क्रममा विभिन्न स्थानमा फसेकालाई खोज गरेर उद्धार गर्ने प्रयास भइरहेको छ” मन्त्री डा. तिमिल्सिनाले भने “जीवितै फेला पार्न सकिन्छ भन्ने आशा छ । संसारभर उद्धारको इतिहासमा त्यस्ता कतिपय चमत्कार भएका घटना पनि छन् ।”