पोखरा महानगरपालिकाभित्र बाहिरबाट सयपत्री फूलमाला आयातमा प्रतिबन्ध लगाएको छ । महानगरपालिकाले स्थानीय उत्पादन सयपत्री फूलको मूल्य पनि तोकेको छ ।

पोखरा महानगरपालिकाको आर्थिक विकास महाशाखा, पुष्प व्यवसायी संघ कास्की, कृषि सञ्जाल, सयपत्री फूल उत्पादक कृषक र वितरकको संयुक्त बैठकले सयपत्री फूलको दररेट निर्धारण गरिएको जनाएको छ ।

फूलको ग्रेडिङ अनुसार फरक मूल्य निर्धारण गरेको महानगरको आर्थिक विकास महाशाखाले जनाएको छ । ‘ए’ ग्रेडको सयपत्री फूलको थुंगालाई ५ रुपैयाँ मूल्य निर्धारण गरिएको छ । प्रति मालाको २ सय रुपैयाँ मूल्य तोकिएको छ । ‘ए’ ग्रेडको थुंगा १५ देखि २० ग्रामको हुनेछ ।

१० देखि १५ ग्राम तौल भएको थुुंगालाई ‘बि’ ग्रेडमा वर्गीकरण गरिएको छ । प्रति थुंगाको ४ रुपैयाँ र मालाको १८० रुपैयाँ मूल्य निर्धारण गरिएको हो ।

५ देखि १० ग्राम तौल भएको ‘सि’ ग्रेडको थुंगालाई २ रुपैयाँ र मालाको १५० रुपैयाँ निर्धारण गरिएको छ । प्रतिकेजीको ४ सय रुपैयाँ मूल्य निर्धारण गरिएको छ । तोकिएको मूल्य बढीमा बेचे कारबाही गरिने भएको छ ।

पोखरा महानगरपालिकाले सघाएर १६० किसानले सयपत्री फूलखेती गरेका छन् । ४० बढी नर्सरीले पनि फूलखेती गरेका छन् । पोखरामा झन्डै ३ सय रोपनी क्षेत्रफलमा सयपत्री खेती भएको छ ।

यस पटक तिहारमा पोखराकै फूलमाला उपयोग गरिने भएको हो । गत वर्ष तिहारको दिन १ हजार भन्दा माथि १२ सय, १५ सयसम्ममा तयारी माला किन्नुपर्दा उपभोक्ता मारमा परेका थिए ।