पोखरा-   घरमा एक्लै बालिका रहेको मौका छोपी झ्याल बनाउने निहुँमा प्रवेश गरेर सुनका गरगहना तथा नगद चोरी गर्ने घटनामा संलग्न दुई जनालाई प्रहरीले पक्राउ गरेको छ ।

पक्राउ परेकामध्ये एक जनाले चोरीका गरगहना खरिद गरेको खुलेपछि उनलाई समेत नियन्त्रणमा लिइएको हो कास्की प्रहरीका सूचना अधिकारी विरेन्द्र कुमार पासवानले जानकारी दिए ।

उनका अनुसार गत जेठ २४ गते पोखरा महानगरपालिका–१५ स्थित मनिषा थापाको घरमा बालिका मात्रै रहेको अवस्थामा एक व्यक्ति “झ्याल–ढोका बनाउन नाप लिन आएको” भन्दै घरभित्र प्रवेश गरेका थिए । त्यसपछि

उनले झ्याल नजिकैको कोठाको ढोका तोडफोड गरी विभिन्न सुनका गरगहना र नगद ११ हजार रुपैयाँ चोरी गरेका थिए ।

घटनाबारे सूचना प्राप्त भएपछि जिल्ला प्रहरी कार्यालय कास्की र वडा प्रहरी कार्यालय रामबजारबाट खटिएको टोलीले प्राविधिक अनुसन्धान अघि बढाएको थियो । अनुसन्धानका क्रममा चोरीमा काठमाडौँ महानगरपालिका–९ शिवनगर बस्ने ३५ वर्षीय भुवनबहादुर साह शंकरको संलग्नता रहेको पुष्टि प्रवक्ता पासवानले बताए ।

प्रहरीले असार ४ गते काठमाडौँस्थित उनको डेराबाट चोरीका सामानसहित साहलाई पक्राउ गरेको थियो ।

थप अनुसन्धानका क्रममा उनले चोरी गरेका सुनका गरगहना सिन्धुपाल्चोक जुगल गाउँपालिका–२ घर भई हाल काठमाडौँ महानगरपालिका–७ मूलपानी बस्ने ३५ वर्षीय बिराज सुनारलाई बिक्री गरेको खुलेको हो ।

प्रहरीका अनुसार पक्राउ परेका सुनारको साथबाट करिब ६ लाख ५० हजार रुपैयाँ बराबरका सुनका गरगहना बरामद गरिएको छ । साथै, नगद ८१ हजार ५०० रुपैयाँ, चोरीका घटनामा प्रयोग भएको पोशाक तथा अन्य सामग्री पनि बरामद गरिएको छ ।

दुवै जनाविरुद्ध कास्की जिल्ला अदालतबाट चोरी तथा डाँका सम्बन्धी कसुरमा छ दिनको म्याद थप गरी अनुसन्धान भइरहेको जिल्ला प्रहरी कार्यालय कास्कीले जनाएको छ ।