पोखराको मणिपाल शिक्षण अस्पतालमा मृतकका आफन्त सामू ‘डाक्टरहरूलाई साफ चुटेर आएँ’ भन्दै अपशब्द बोलेका प्रहरी निरीक्षक (इन्स्पेक्टर) मदन श्रेष्ठ निलम्बनमा परेका छन् । यस्तै, कमाण्ड सम्हाल्न नसकेको भन्दै वडा प्रहरी कार्यालय बैदामका प्रमुख डीएसपी वेदप्रकाश जोशीलाई सरुवा गरिएको छ ।

इन्स्पेक्टर श्रेष्ठलाई तत्काल अनुसन्धानका लागि निलम्बन गरिएको प्रदेश प्रहरी कार्यालय प्रमुख प्रहरी नायब महानिरीक्षक (डिआईजी) बुद्धिराज गुरुङले जानकारी दिए । डाक्टरहरुको भीडलाई लाठिचार्ज गरेर फर्किएपछि उनले अश्लिल शब्द बोल्दै ‘डाक्टरलाई साफ चुटेर आएँ, ढुटो पारेर रगतै रगत बनाएँ’ भनेको भिडियो भाइरल छ ।

विवादास्पद अभिव्यक्ति दिएपछि उनको चर्को विरोध पनि भइरहेको छ । उनीमाथि छानबिन गर्न प्रदेश प्रहरी कार्यालय, गण्डकीका प्रहरी वरिष्ठ उपरीक्षक सुरेशसिंह कोइरालाको संयोजकत्वमा समितिसमेत बनेको छ ।

कास्की जिल्ला प्रहरी कार्यालय कास्कीले श्रेष्ठको निलम्बन सिफारिस गरेको हो । जिप्रकाले श्रेष्ठलाई निलम्बनको सिफारिस गृह मन्त्रालयलाई गरेको हो । प्रहरी निरीक्षकदेखि माथिका विभागीय कारबाहीका सम्पूर्ण अधिकार माथि नै रहेको कास्की प्रहरी प्रमुख एसपी मोहन थापाले गण्डकन्यूजलाई जानकारी दिए ।

छानबिन तथा अनुसन्धानका लागि इन्स्पेक्टर श्रेष्ठलाई निलम्बन गरिएको प्रहरी प्रधान कार्यालयका प्रवक्ता प्रहरी नायब महानिरीक्षक कुवेर कडायतले पुष्टि गरेका छन् । निलम्बनको अवधि छ महिनाको हुन्छ । दोषी देखिए नियमानुसार विभागीय कारबाही हुन्छ । इन्स्पेक्टर श्रेष्ठ हालै कास्कीमा सरूवा भएर आएका हुन् ।

डीएसपी जोशीको सरुवा

जिल्ला प्रहरी कार्यालय कास्कीका प्रमुख एसपी मोहन थापाले जोशीको प्रहरी प्रधान कार्यालय अपराध अनुसन्धान विभागमा सरुवा भएको पत्र प्राप्त भएको जानकारी दिए ।

अब बैदामको नेतृत्व डीएसपी राजेन्द्र श्रेष्ठले सम्हाल्नेछन् । ‘डीएसपी जोशीको सरुवा भएको हो । प्रधान कार्यालय अपराध अनुसन्धान विभागका डीएसपी राजेन्द्र श्रेष्ठसँग परस्पर सरुवा भएको हो ।’ एसपी थापाले भने ।

मणिपाल अस्पताल वडा प्रहरी कार्यालय बगरको कार्यक्षेत्र भित्र पर्ने भएपनि त्यसभन्दा माथिको पोष्टमा रहेका डिएसपी जोशीलाई थप मद्धतका लागि सुरक्षा नेतृत्वको जिम्मा दिइएको थियो । प्रहरीले डाक्टरहरुलाई कुट्नू र इन्सपेक्टरले मनलाग्दी अश्लिल बोल्दै डाक्टर कुटेको बताउनू नै प्रहरीको कमजोरी रह्यो ।

जोशी गत फागुनमा बैदाम प्रहरी प्रमुख आएका थिए । सामान्यतया कार्यअवधि १ वर्षको हुने गरेको छ । उनी आधा समय बाँकी रहँदै सरुवा भएका हुन् । जोशी जिल्ला तानिएको खबरहरु सार्वजनिक भएपनि उनी हेडक्वार्टर नै तानिएका हुन् । जोशी संगठनमा तुलनात्मक रुपमा नम्र प्रहरी अधिकारी मानिन्छन् । उनी गत वर्ष नेपाल प्रताप सुभूषण पदकबाट विभुषित पनि भएका थिए ।

सोमबार मणिपाल अस्पतालमा उपचाररत लमजुङकी ५७ वर्षीया सुकमाया दुराको निधन भएको थियो । त्यसपछि दुराका आफन्त र चिकित्सकबिच विवाद उत्पन्न भई डाक्टरमाथि कुटपिट भएको थियो । चिकित्सकहरु सेवा नै ठप्प पारी आन्दोलित छन् । मणिपालमा भर्ना भई उपचार गराइरहेका अरु बिरामीहरुको उपचार पनि प्रभावित भएको छ

सम्बन्धित समाचारः

संरक्षण गर्नुपर्ने प्रहरीले नै डाक्टर कुटे ! [भिडियो]